أحمد حلمي يكشف سبب مشاركته بدور صغير في “سيرة أهل الضي”

كشف الفنان المصري أحمد حلمي أنه أصر على المشاركة في فيلم “سيرة أهل الضي” رغم صغر حجم دوره ومعارضة البعض.

وقال حلمي في تصريحات، بعد عرض الفيلم في مهرجان برلين السينمائي ضمن مسابقة أجيال: “أنا مؤمن أن في الدنيا دي حاجات بتناديلك، والكلمة اللي كنت بسمعها طول الوقت لما قلت هعمل المشهدين أو ثلاثة دول وكأن الفيلم هيتضاف له حاجة، طول الوقت بيقولولي كده وأنا طول الوقت بقولهم مش كدا”.

وأضاف حلمي: “طول الوقت بقولهم إن الفيلم هو اللي هيضيف لي أنا حاجة، وقد كان، ..النهاردة أنا واقف في برلين بفيلم مصري، وسعيد جدا وفخور ..أحيانا ممكن تطلع مشهد واحد يوازي 10 أفلام”.

 وتابع: “أنا النهاردة موصفلكش مدى سعادتي بالدور الصغير اللي أنا عملته في الفيلم ده، وإن أنا كنت جزء ولو بسيط في هذا العمل الرائع، الناس رحبت أوي بالفيلم..أنا كنت مذهول برد الفعل”.

وعن الدور قال حلمي: “الأول أنا مخدتش فلوس في الفيلم، والحاجات بتناديلك أنا كنت معجب بالدور..ولما جالي كنت شغال فقولت مش هعمله لغاية ما تلف الأيام ويخلصوا تقريبا تصوير ما عدا المشهدين دول، فبسأل عليهم بالصدفة قالولي لسه ما اتعملوش، فشبطت فيهم، هذا الفيلم إضافة لي وأنا فخور حتى لو كانوا كام جملة إن أنا أشتغل معاكم”.

وكان مؤلف الفيلم هيثم دبور قد شارك متابعيه على صفحته الشخصية بموقع “إنستغرام ” بصور من حضور أبطال فيلم “سيرة أهل الضي” مهرجان برلين السينمائي، معلقا: “العرض الأول لفيلم ضي (سيرة أهل الضي) في مهرجان برلين ضمن مسابقة أجيال، قاعة مكتملة وجمهور مبهر، رحلة طويلة ممتن لكل واحد آمن بيها وصدقها رغم صعوبتها.. واللي كنت أتمنى إن كلهم يكونوا موجودين النهاردة، دايما بقول ضي فيلم بيحكي قصة عيلة لا تملك سوى أحلامها.. زي صناع العمل بالضبط”.

يذكر أن فيلم “ضي” يحكي قصة مراهق ألبينو (عدو الشمس) نوبي، في رحلة من جنوب مصر إلى شمالها مع عائلته المفككة ومدرسة الموسيقى الخاصة به، ويتمتع هذا المراهق بصوت ساحر ويسعى من أجل تحقيق حلمه.

والفيلم بطولة الممثلة السعودية أسيل عمران، والسودانية إسلام مبارك، وعدد من الفنانين المصريين أبرزهم حنين سعيد، وبدر محمد.

كما يشارك بالفيلم عدد من كبار النجوم كضيوف شرف على راسهم محمد منير، وأحمد حلمي، ومحمد ممدوح، وتامر نبيل، وأمينة خليل، وأحمد عبد الحميد، ومحمد شاهين، وعارفة عبد الرسول، والإعلامية لميس الحديدي، وحنان سليمان.