نفى الشاعر الكبير بهاء الدين محمد ماذكره الملحن عمرو مصطفى عن الحادثة التي تخص الفنانه شيرين وانهم تحايلوا عليه هو والمنتج نصر محروس أن يستمع للفنانه شيرين .
وقال بهاء الدين : عندما بدأت شيرين الدخول في الفن كنت أنت هاوي ومازلت في بداية مشوارك فكيف نتحايل عليك ؟ !
وكتب عبر صفحته بياناً رسمياً قال فيه :
أولاً: فوجئت على أكثر من موقع إعلامي وصحفي إنك ذكرت إسمى وإسم الأستاذ المنتج نصر محروس كشهود على وقائع لم تحدث وإدعاءات غير صادقة تمس شخص الفنانة المطربة شيرين عبد الوهاب بصورة غير حضارية ولا فني .
الشاعر بهاء الدين محمد
ثانيا: على ما أتذكر إنك ماكنتش لسة موجود كملحن في الفترة اللي بدأت شيرين فيها وجودها الفني ولو كنت موجود كملحن في بدايتك أظن من الصعب على شخصي وشخص نصر محروس إننا نتحايل عليك تسمع صوتها وهذا كلام غير صحيح .
ومش ح اتكلم عن الكلام التاني اللي أنت كتبته عن شيرين وتناولته المواقع والصحف اللي مايصحش أكرره تاني لعدم صحته ولبواخته وتهوره .
ثالثا: شيرين عبد الوهاب .. مطربة لها مكانتها ووجودها اللي أظن هجومك عليها بالأسلوب والمستوى ده كان تهور غير محسوب !!!
رابعا: نصيحة من أخ أكبر ليك: ماتخسرش المحترمين بتهور لأن الدنيا مابقاش فيها ناس كتير يستاهلوا نحافظ عليهم .
وماعندناش نجوم كتير في نفس المكانة.. والمفروض فنان بإسمك وحجمك لازم يحاسب ويحافظ على صورتنا وصور نجومنا قدام الناس والوطن العربى وأخيراً منتظر منك الإعتذار للجميع لأنى أثق إنك بتحترم الكبار .
خامسا: اخترت ردى يكون بنفس الأسلوب اللي اتبعته في هجومك على شيرين وذكر اسمنا كشهود على وقائع لم تحدث .
وف انتظار اعتذار الفنان اللي جواك”.
